Жүкті әйелінің мойнына шаңсорғыш сымын байлаған: СҚО-да ер адам 4 жылға сотталды

Солтүстік Қазақстан облысының тұрғыны жүкті әйеліне жүйелі түрде зорлық-зомбылық көрсеткені үшін 4 жылға бас бостандығынан айырылды. Сотталған ер адам үкіммен келіспей, жазаны жеңілдетуге әрекеттенген, алайда кассациялық сот оның өтінішін қанағаттандырмады, деп хабарлады MadeniPortal.kz.

Кассациялық соттардың мәліметінше, ер адам 2024 жылдың тамыз-қазан айлары аралығында жүкті әйеліне бірнеше рет физикалық және психологиялық қысым көрсеткен.

Сот материалдарында оның әйелдің басынан, бетінен, иығынан және ішінен ұрғаны, тұншықтырғаны айтылған. Сондай-ақ жәбірленушінің мойнына шаңсорғыштың сымын байлап, бөлмеден шығармай ұстаған және медициналық көмекке жүгінуіне кедергі келтірген.

Ер адам Қылмыстық кодекстің 110-бабы 2-бөлігінің 3-тармағы – жүкті әйелді азаптау бойынша кінәлі деп танылып, бірінші сатыдағы сот оны 4 жылға бас бостандығынан айырған. Апелляциялық сот та үкімді өзгеріссіз қалдырды.

Іс кассациялық сатыда қайта қаралғанымен, сот сотталушының кінәсі жеткілікті дәлелдермен расталған деген қорытындыға келді. Жәбірленушінің сөздері куәгерлердің жауабымен, оқиға бейнежазбасымен, медициналық құжаттармен және сараптама қорытындыларымен сәйкес келген.

Сот жазаны жеңілдетуге құқықтық негіз жоқ деп тауып, 4 жылдық түрме жазасын өзгеріссіз қалдырды.