“Сылтау айтқан жоқ”: Спорт журналисі Сәкен Бибосынов туралы ақпаратпен бөлісті

“Жарақатпен жұдырықтасты!

Сәкен Бибосыновтың оң қолын бинтпен орап, жаттығып жүрген видеосын көрдім. Бұл жарақат Семейде өткен Қазақстан чемпионатында алынды. Финалға дейінгі айқастарда сындырып алған еді. Соған қарамастан Сәкен жарысты жалғастырам деді. Сылтау айтқан жоқ, жарыстан шыққан жоқ. Мырза ағайдың “на характере алып шығасың” деген сөзі бар. Сол қайсар мінездің арқасында ел үздігі атанды. Араға төрт күн салып, кәсіпқой бокста да жеңіске жетті. Не деген табандылық?! Енді әлгі қолмен икемге келетін жаттығуларды істеп, дайындықты да тоқтатпай жатыр.

Бұған дейін Серік Сәпиев не Бақтияр Артаев сияқты ағаларымыздың осындай жағдайларын естігем. Сәкеннің қолы сынғанын көрдім және осынша қайтпастығына таңқалдым. Дәл осылай Тайландтағы Азия чемпионатында аяғының сіңірі жыртылғанына қарамастан рингке шыққанына да куәгер болдық. Сәкенді жерден алып, жерге салатындар осындай моменттерге де мән берсе деймін. Жарысқа дейінгі жасаған жаттығуы мен төккен терінен бөлек, сын сағатында сынбай, тәуекелге бел буып, айқасқа араласатыны бар. Бұндай жанкештілік жасайтындар өте сирек. Сондықтан, қолда бардың қадірін біліп, уақытында қолдау танытайық. Сәкенге тезірек сауығып кетуді тілейміз! Сәттілік!”, — деп жазды журналист.