“Майқанова бұрынғыдан да қаталырақ болмақ: Актриса Инабат Ризабекқызы өз рөлінің ерекшелігін айтты

●    –Жаңа нұсқадағы Майқанова апайдың образы түпнұсқадан қалай ерекшеленеді?

●   –Прототип болған соң бұрынғы фильмді қайта қарап, Раиса Мұхамедиярованың актерлік шеберлігін біраз зерттедім. Бұл фильм бұрынғы “Менің атым Қожа” фильмінің жалғасы. Қожа түпнұсқа фильмде 5 сыныпта оқыса, жаңа форматта 8 сыныпта оқиды.  Жаңа Майқанованың түпнұсқадағы Майқановадан ерекшелігі бұрынғыдан да қаталдығы болмақ. Бұл кино қазіргі заманға сай фильм емес. Бұл фильм бұрынғы “Менің атым Қожа” фильмінің жалғасы. Бұрынғы бала Қожа бүгінде өсіп келе жатқан, қызға ғашық болып келе жатқан ересек Қожа. Фильмнің басты ерекшелігі осыда.

●    –Түсірілім барысында өзіңізге ерекше әсер еткен оқиға болды ма?

●   –Бұл киноның бір ерекшелігі – әртістік құрам нағыз әртістерден құралған. Яғни басқа фильмдерге блогерлер, әлеуметтік желіде белсенді адамдар түссе, бұл фильмде нағыз өз ісінің мамандары жиналған. Мәселен, Рахманов ағайды, мектеп директорының рөлін сомдайтын Мұхтар Әуезов атындағы Қазақ ұлттық драма театрының әртістері : Дулыға Ақмолда мен Бекжан Тұрыс ағаларымыз. Осындай тұлғалармен бірге түсірілім алаңында болу мен үшін үлкен абырой және үлкен жауапкершілік болды. Сондықтан мен әр сахнама өте тиянақты дайындалатынмын. Дулыға ағаның бір айтқан сөзі бар еді : “Осы фильмнің бір жақсысы барлығымыз театраллдармыз, яғни кәсіби әртістерміз”.  Өз сахнамызды күтіп отыра кетсек болды театр, өнер туралы сөйлесетінбіз. Сол кісілердің өнегелі әңгімелерін тыңдаған сәттер өзіме ерекше әсер етті.

●    –Жас әртістермен жұмыс барысы қалай өтті? Оларға қандай кеңес бересіз?

●   — Жас әртістермен жұмыс жасау қызықты болды. Түсірілімнен тыс уақытта өте қызықты жағдайлар көп болды. Қожаның рөлін сомдаған Айқын Елубай мен Сұлтанның рөлін сомдаған Олжас Қалғапбар дарынды әртістер. Әрине балалар жас болған соң шыдамсыз болады. Сондықтан мен қазіргі өсіп келе жатқан әртістерге айтарым: шыдамды болыңыздар, өнер жолы қиын жол. Біреудің бағы шапса, біреудің бабы шабады. Жалпы өнер жолында жүрген адамдарға айтарым: Ең бастысы шыдамдылық. Сонымен қатар, өнерге қалай таза болып келдің дәл сол күйіңде қалу маңызды. Өнер адамдарының арасында көреалмаушылық болмауы қажет. Әр әртіс еңбек етсе міндетті түрде өз арманына жетеді . Сондықтан жас әртістерге айтарым: шыдамды  және табанды еңбекқор болыңыздар.

● – “Менің атым Қожа” сияқты классикалық туындыны қайта түсірудің маңызы қандай?

● –  Соңғы сұрағыңызға ерекше тоқталғым келіп тұр.  “Менің атым Қожа. Жаңа саяхат” фильмі түсіріліп бастағаннан бері үзінділері “Tik Tok” желісінде тарап кетті. Сол жерде көп адамдар: Не үшін қайтадан түсіреді? Бұрынғы дүниені қайталап түсірудің не қажеті бар? -деген сұрақтар қойып жатады. Бұл - “Менің атым Қожаның” қайталауы емес. Бұрынғы Қожаның жалғасы. Бұл фильмді түсіру барысында бәрі тиянақты қадағаланды. Менің өзім де Майқанова рөліне бекітілгеннен кейін фильмді тоқтаусыз қарай бердім.  Раиса Мұхамедиярованың өмірін зерттедім, түскен фильмдерін қарап шықтым.  Тіпті менің 4 жасар қызым “Менің атым Қожа” фильмін қайталап көре бастады. Соңғы сұрағыңыз туралы айтсам: мысалы Қыз Жібекті түпнұсқа  сценариймен түсіретін болса не болмақ? Өз басым ондайға қарсымын.  Ондай классикалық туындылар өз құнын жоғалтпауы керек. Ол туындыларды қайталап түсірудің еш мәнісі жоқ деп ойлаймын. Ал “менің атым Қожа” фильмі қайталау емес, жаңа форматта түсірілген туынды. Көп көрермендеріміз соны шатастырып жатады.

● – Сұхбаттасқаныңыз үшін рақмет!

 

Жұлдыз Ербол 9 сынып оқушысы