«Миы шайқалып, ауруханада жатыр»: Шымкентте колледж директорының орынбасары студенттерді ұрып соққан

Шымкенттегі колледждердің бірінде үлкен жанжал шықты. Екі студент директордың орынбасары соққыға жыққанын айтып, шағымданданған.

Оларды әлеуметтік желіде орынсыз пікір үшін соққыға жыққан. Зардап шеккендердің бірі қазір миы шайқалып ауруханада жатыр. Ата-аналар құқық бұзушының қатаң жазалануын талап етіп отыр. 

17 жастағы Абдуғафар аяғына әрең тұрған. Оның бетінде қатты ісік пен сызаттары бар. Оның сөзінше, досы екеуін үш сағаттан астам жертөледе ұстап, ұрып-соққан. 

Жәбірленушілердің сөзінше, TikTok желісіне колледждің бас оқытушысы видео жариялаған. Ал студент жігіттер ол видеоға пікір білдірген. Олардың пікірі мұғалімге ұнамай, екеуін жеке шақырып, колледждің жертөлесіне апарып, соққыға жыққан. Бас оқытушы жалғыз емес, жанында бірнеше дене шынықтыру пәнінің мұғалімдері мен жоғары курс студенттері де болған. 

Балаларының зәбір көргенін білген ата-ана бірден колледжге жетіп, жанжал шығарған. Олар еденнен жуылған қан іздерін тауып, балаларының киімдері қанға боялғанын көрген. Сондай-ақ мұғалімнің қолынан соққы ізін байқадық дейді. Алайда шабуыл жасады деп айыпталған мұғалім бәрін жоққа шығарып отыр. Оның сөзінше, студенттерді жоғары курс студенттері соққыға жыққан. 

Алайда ашуланған ата-ана оған сенбей, полицияға арыз жазған. 

Соққыға ұшыраған студенттердің бірі қазір миы шайқалып ауруханада жатыр. Ата-аналар болса, оқу орны қауіпсіздікті қамтамасыз ете алмағандықтан, балаларының колледжде оқуын жалғастырмайтынын мәлімдеді.