21 күннен бері хабар жоқ: Қызылордада жоғалған жігіттің хаты табылды

Қызылорда облысында 26 жастағы Жанболат Байділләұлының із-түзсіз жоғалғанына 21 күн болды. Жігіт жоғалар алдында екі парақ хат қалдырып, онда өзіне қысым көрсетіп, ақша бопсалады деген адамдардың есімдерін жазған, деп хабарлады MadeniPortal.kz. 

Белгілі болғандай, Жанболат осыдан төрт жыл бұрын Жаңақорған ауданына мал бағуға жұмысқа кеткен. Ата-анасының айтуынша, соңғы уақытта оның жалақысы уақытылы төленбей, жұмыс берушілермен қарым-қатынасы нашарлаған.

Жігіттің жоғалар алдында қалдырған екі парақ хаты туыстарының алаңдаушылығын күшейткен. Онда ол бірнеше жыл бойы өзіне қысым көрсетіліп, ақша бопсаланғанын жазып, бұған қатысы бар деп есептейтін адамдардың аты-жөнін көрсеткен.

Жанболаттың жақындары оны белгісіз біреулер күштеп ұстап отыруы мүмкін деп күдіктенеді. Алайда бұл болжам әзірге ресми түрде расталған жоқ.

Қазіргі уақытта жоғалған жігітті іздеуге полиция, Төтенше жағдайлар департаментінің қызметкерлері, сүңгуірлер мен кинологтар жұмылдырылған. Іздеу жұмыстарына дрондар да пайдаланылып жатыр.

Алайда үш аптаға созылған іздеу шараларына қарамастан, 26 жастағы Жанболат Байділләұлының қайда екені әлі анықталған жоқ.

Жігіттің жоғалу мән-жайы мен хатта көрсетілген адамдарға қатысты ресми тергеу қорытындысы әзірге жарияланбаған.