«Айналайын, 100 млн теңгені не істейсің?» - Мәжіліс төрағасы мәдениет министрлігіне шүйлікті

Мәдениет және Спорт министрлігі мемлекеттік бағдарламаның концепиясын жаздыру үшін бюджеттен 100 млн теңге сұрап отыр.

«Әрине, біз мәдени мұраны сақтауымыз керек, қорғауымыз керек, қаражат бөлуіміз керек. Оған ешқандай сөз жоқ, Елдос Мұратұлы. Бірақ сіздердің министрліктеріңізде аппарат бар ғой? Бар. Сол аппаратта жақсы мамандар бар ма? Өзіңізді сол мамандардың қай тобына жатқызасыз? Жарайды, бірінші топқа дейік», - деді Мәжіліс спикері.

«Министрлікке резюме жібергенде 4-5 диплом көрсетіп, қаншама тәжірибеден өттік дейсіздер, ал сұрақ қойса орташамын дейсіздер. Менің білуімше, министрліктің аппаратында 300-дей адам жұмыс істейді. Сонымен қатар, мұражайлар бар, басқа да мәдени орталықтар бар. Солай емес пе? Солай. Олардың арасында қаншама ғылыми қызметкер бар. Тағы да әртүрлі сарапшылар жұмыс істейді. Осылардың ішінен бағдарлама емес, концепцияны жасайтын бір топ шықпаса, онда осыншама қызметкерлер не үшін керек?», - деді Нұрлан Нығматулин. 

«Сол 100 млн теңге ақшаны айтып, кеше министр келген. Сонда Бердібек Мәшбекұлы екеуміз (Премьер-министрдің орынбасары - агенттік) «Айналайын, 100 млн теңгені не істейсіңдер, кімге бересіңдер» деп сұрадық. «Бір топты жалдап, концепция жаздырамыз» дейді. Бұл масқара нәрсе ғой! Сонда, министрдің аппараты не істейді? Барлық мемлекеттік орган осындай. Сосын Үкімет пен парламентке келіп, өздеріңіздің еңбектеріңіздей етіп таныстырасыздар. Неге мемлекет артық ақша жұмсауы керек, соны түсінбеймін», - деді спикер.