Анасы жалғыз ұлын күтіп қалған: Меркіде төрт адамның өмірін қиған жол апаты болды

Жамбыл облысының Меркі ауданында екі көлік соқтығысып, салдарынан төрт адам қаза тапты. Қайғылы жағдай Қостөған ауылының кіреберісінде болған, деп хабарлады MadeniPortal.kz.

Жамбыл облыстық полиция департаментінің алдын ала мәліметінше, TANK 500 автокөлігінің жүргізушісі қарсы бағыттағы жолаққа шығып кетіп, ВАЗ-2107 көлігімен соқтығысқан.

Апат салдарынан ВАЗ жүргізушісі мен жол талғамайтын көліктегі үш жолаушы оқиға орнында көз жұмған. TANK 500 жүргізушісі аудандық ауруханаға жеткізілген.

Әлеуметтік желіде тараған мәлімет бойынша, ВАЗ көлігін 27 жастағы Мұхаммад Махмудов басқарған. Туыстарының айтуынша, ол анасын алып кетуге шыққан және отбасының жалғыз ұлы болған. Жақындары марқұмның жақын арада үйленуді жоспарлағанын да айтқан.

Жол талғамайтын көлікті бұрын Қостанай облысының полиция департаментінде қызмет еткен Сая Әуелбековабасқарғаны хабарланды. Жамбыл облысының полициясы қазіргі уақытта оның ішкі істер органдарының қызметкері емес екенін нақтылады.

Марқұмның туыстары істің объективті тергелуін талап етіп отыр. Ал полиция жол апатына байланысты қылмыстық іс қозғалып, барлық мән-жайды анықтауға бағытталған тергеу амалдары жүргізіліп жатқанын мәлімдеді. Істің тергелу барысы облыстық полиция департаменті басшылығының бақылауына алынған.