Елімізде жоғары оқу орындарын қала сыртына көшіру ұсынылды

Қазақстанда қала халқының басым бөлігі үш мегаполисте - Астана, Алматы және Шымкентте шоғырланған. Юлия Кучинскаяның айтуынша, осындай ірі қалаларда халық саны инфрақұрылымның дамуынан әлдеқайда жылдам өсіп, жаңа тұрғын аудандарда мектеп, емхана, жол, кәріз жүйесі мен жарық жетіспей жатыр. Бұл жағдай әлеуметтік теңсіздікті күшейтіп, басқа өңірлерден көшіп келген тұрғындардың қала өміріне бейімделуін қиындатады.

Қала маңындағы елді мекендерде тұрғындардың нақты саны ресми статистикадан әлдеқашан асып кеткен. Салдарынан коммуналдық желілер, автобустар мен ауруханалар шамадан тыс жүктемемен жұмыс істеп тұр. Депутаттың айтуынша, "Агломерацияларды дамыту туралы" заң әзірге нәтиже бермей отыр.

Қалалардағы өмірді жақсарту үшін депутат жолдар, мектептер, емханалар мен инженерлік желілер дайын болмайынша, жаңа тұрғын үй кешендеріне адам қоныстандырмауды ұсынды. Сондай-ақ ұсыныстар тізімінде әрбір қаланың инфрақұрылымдық жағдайы мен экономикалық әлеуетін тексеріп, содан кейін оларды дамыту жоспарларын жаңарту, ортақ инфрақұрылымға жұмсалатын шығындарды мегаполистер мен оларға іргелес облыстар арасында әділ бөлу, жолаушылардың нақты ағынын ескере отырып, бірыңғай "қала-қала маңы" бағыттарын құру және жүйрік электр пойыздарын іске қосу да бар. Одан бөлек мектептердің, кітапханалар мен мәдениет үйлерінің бос бөлмелерін балалар секциялары мен отбасылық демалыс үшін пайдалану, қалаларды өмір сүру сапасы, көлік қолжетімділігі мен тұрғындардың белсенділігі бойынша бағалау, сондай-ақ урбанизацияны жоспарлауға ғалымдарды тарту да қарастырылған.