Қазақстан азаматы Дубайда өмір бойына сотталды

«Қазақстан Республикасының Сыртқы істер министрлігі БАӘ-де ұсталған Қазақстан азаматы Е. Алмаханға қатысты жағдайдан хабардар. 2026 жылғы 18 наурызда Дубай қаласының бірінші сатыдағы соты азамат Е. Алмаханды бірқатар ауыр қылмыстар бойынша кінәлі деп танып, оны өмір бойына бас бостандығынан айыру және айыппұл төлеу туралы үкім шығарды», - деп хабарлады сейсенбі күні СІМ баспасөз қызметінен.

«Өз кезегінде Қазақстан елшілігі БАӘ-нің құзыретті органдарына ресми сауал жолдады. Қазіргі уақытта жауап күтілуде. Дубайдағы Бас консулдық өз құзыреті шеңберінде тиісті консулдық-құқықтық қолдау көрсетуді жалғастыруда. Бұл мәселе министрліктің ерекше бақылауында», - деп толықтырды СІМ өкілдері.

«Оның анасы ұлының кінәсіне сенбейтінін және оған жала жабылған болуы мүмкін деп санайтынын айтады. Сондай-ақ, отбасы ұзақ уақыт бойы тағылған айыптардың мән-жайы туралы толық ақпарат ала алмағандарын мәлімдеді. Туыстары үкім туралы тек 2026 жылдың сәуір айында ғана білген. Әңгіме бірінші сатыдағы соттың 18 наурызда шығарған шешімі туралы болып отыр.  Бірқатар басылымдар бұл істі 2025 жылғы жаңа жыл түнінде Дубайдағы Finiko қаржы пирамидасының негізін қалаушылардың бірі Эдвард Сабиров тұрған виллаға жасалған шабуылмен байланыстырады», - делінген хабарламада.