«Құпияңды ашамыз»: интимдік қызмет клиенттерінен 3 миллион теңге бопсалаған ерлі-зайыпты сотталды

Маңғыстау облысында құқық қорғау органының қызметкерлері болып танысып, азаматтарды қорқытып ақша талап еткен ерлі-зайыптыға сот үкімі шықты. Олар жәбірленушілерден 3 миллион теңге бопсалаған, деп хабарлайды MadeniPortal.kz. 

Прокуратура мәліметінше, сотталғандар интимдік қызмет көрсететін адамның клиенттері туралы жеке мәліметтерді қолға түсірген. Кейін осы ақпаратты пайдаланып, өздерін құқық қорғау органдарының қызметкерлері ретінде таныстырған.

Ерлі-зайыпты азаматтарды күш қолданамыз деп қорқытып, жеке мәліметтерін жария етеміз деген қоқан-лоқы арқылы 3 миллион теңге талап еткен.

Сот барысында мемлекеттік айыптаушы олардың кінәсін дәлелдейтін айғақтарды ұсынған. Сот жинақталған дәлелдемелерді жеткілікті деп танып, айыптау үкімін шығарды.

2026 жылғы 25 қыркүйектегі сот үкімімен ерлі-зайыпты Қылмыстық кодекстің 194-бабы («Қорқытып алу») бойынша кінәлі деп танылды.

Сот шешімімен А. есімді сотталушы 4 жыл 6 айға бас бостандығынан айырылды. Ал Р. есімді сотталушыға 4 жыл бас бостандығынан айыру жазасы тағайындалып, оны өтеу бір жылға кейінге қалдырылды.

Сот үкімі әзірге заңды күшіне енген жоқ.

Маңғыстау облысының прокуратурасы азаматтарға қорқыту, бопсалау немесе заңсыз ақша талап ету жағдайларына тап болғанда дереу полицияның «102» нөміріне хабарласу қажеттігін ескертті.