Қытайда робот жаңа әлемдік рекорд орнатты

Қытайда AgiBot A2 гуманоид роботы 106,286 шақырымды жаяу еңсеріп, жаңа әлемдік рекордқа қол жеткізді, деп хабарлайды MadeniPortal.kz.

Сапар Сучжоу қаласындағы Цзинцзи көлі маңынан басталып, Шанхайдың әйгілі Бунд жағалауында аяқталды. Бұл нәтиже Гиннестің рекордтар кітабы тарабынан ресми түрде расталды.

Компания мәліметінше, робот жол бойында қала көшелерінен, туристік аймақтардан және автомобиль жолдарынан өткен. Ол қозғалыс кезінде барлық жаяу жүргінші мен жол қозғалысы ережесін сақтап отырған. A2 толық қашықтықты бірде бір рет өшпей, автономды түрде бағындырды. Мұндай тұрақтылыққа оның арнайы әзірленген ауыстырмалы аккумулятор жүйесі мүмкіндік берген. Ұзақ сапардың жалғыз салдары — резеңке табанның аздап тозуы ғана.

AgiBot компаниясының аға вице-президенті Ван Чуанның айтуынша, сынаққа ешқандай қосымша жетілдірусіз, стандартты сериялық модель қатыстырылған. Жорық алдында робот қосарланған GPS жүйесімен, лидармен және инфрақызыл тереңдік камераларымен жабдықталған. Бұл технологиялар оған күрделі учаскелерде де, тіпті түнгі уақытта да қоршаған ортаны дәл анықтап, бағытты сенімді түрде ұстануға мүмкіндік берген.

AgiBot A2-нің бұл жетістігі Қытайдың робототехника саласындағы технологиялық әлеуеті мен инновациялық қарқынының жоғары екенін тағы бір мәрте дәлелдеп отыр.