Тарифтер арзандауы мүмкін бе: Қазақстанда төртінші ұялы оператор мәселесі көтерілді

Қазақстанда төртінші ұялы байланыс операторын құру мәселесі әзірге тек талқылау және талдау деңгейінде. Бұл туралы Жасанды интеллект және цифрлық даму министрлігі Телекоммуникация комитетінің төрағасы Дамир Сейсенбаев Үкімет отырысынан кейінгі брифингте мәлімдеді, деп хабарлады MadeniPortal.kz. 

Бұл туралы Қазақпарат жазды. Оның айтуынша, қазір елімізде үш ұялы байланыс операторы жұмыс істейді. Бұл халықаралық тәжірибеге сәйкес келеді. Көршілес елдерде операторлар саны екіден төртке дейін жетеді.

Алайда Tele2 компаниясын қатарлық инвестордың сатып алуына байланысты жасалған үкіметаралық келісімге сәйкес, 2026 жылдың соңына дейін 5G жиіліктері бойынша жаңа аукцион өткізу және жаңа ұялы байланыс операторын құру мүмкін емес.

Комитет басшысы төртінші оператор нарыққа кіретін болса, оның нақты пайдасы болуы керектігін атап өтті. Яғни жаңа ойыншы байланыс инфрақұрылымының сапасын арттырып, қызметтердің қолжетімділігін жақсартып, тарифтердің төмендеуіне ықпал етуі тиіс.

«Егер мұндай нәтиже болмаса, төртінші операторды құрудың қандай қажеті бар?» – деді ол.

Сонымен қатар Қазақстан шетелдік байланыс компанияларын нарыққа тартуды жалғастырып жатыр. 2025 жылы Starlink-пен келісім жасалып, еуропалық спутниктік оператор OneWeb-ке Қазақстанда жұмыс істеуге лицензия берілген.

Әзірге төртінші ұялы байланыс операторын құру бойынша нақты шешім немесе жоспар жоқ.