Үш тәуліктен кейін дәрігерге жүгінген: Денсаулық сақтау министрлігі Маңғыстауда қайтыс болған бала жайында тың дерек айтты

Маңғыстау облысында ысталған балық жегеннен кейін ауыр халде ауруханаға түскен бала қайтыс болды. Денсаулық сақтау министрлігі қайғылы жағдайдың мән-жайын түсіндірді, деп хабарлайды MadeniPortal.kz.

Ведомствоның 8 қазанда таратқан мәліметіне сәйкес, бала ысталған балық өнімін тұтынғаннан кейін өзін жайсыз сезінген. Алайда оның жақындары медициналық көмекке аурудың алғашқы белгілері байқалғаннан үш тәулік өткен соң ғана жүгінген.

Дәрігерлер баланы дереу ауруханаға жатқызған. Сол кезде оның жағдайы аса ауыр деп бағаланған.

Қосымша медициналық тексерулерден кейін бала сол күні облыстық балалар ауруханасына ауыстырылып, бірден жансақтау және қарқынды терапия бөліміне орналастырылған.

Мамандар клиникалық белгілеріне сүйене отырып, балада тағамдық ботулизм болуы мүмкін деген күдікке келген.

Дәрігерлер науқастың өмірін сақтап қалу үшін қажетті медициналық көмек көрсетіп, реанимациялық шаралар жүргізген. Алайда аурудың ауыр өтуіне байланысты баланың жағдайы жақсармаған.

Министрлік мәліметінше, науқастың ағзасында қайтымсыз өзгерістер пайда болып, ми ісінуі, көптеген ағза қызметінің жеткіліксіздігі және III дәрежелі кома дамыған.

Осылайша, дәрігерлердің барлық күш-жігеріне қарамастан, баланың өмірін сақтап қалу мүмкін болмаған.

Айта кетейік, ботулизм – жүйке жүйесін зақымдайтын, ауыр жағдайда тыныс алу бұлшықеттерінің салдануына әкелуі мүмкін қауіпті тағамдық улану түрі. Аурудың белгілері байқалған жағдайда дереу медициналық көмекке жүгіну қажет.