Ыстанбұлда көз жұмған қазақстандық қыздың соңғы сәттері камераға түсіп қалған

Түркияның Ыстанбұл қаласында 26 жастағы қазақстандық Айсұлу Бекмаханованың қаза табуына байланысты тергеу жалғасып жатыр. Іс бойынша ұсталған екі адамның сот бақылауымен босатылғаны белгілі болды, деп хабарлайды MadeniPortal.kz DHA ақпарат агенттігіне сілтеме жасап.

Түркиялық БАҚ мәліметінше, тергеу аясында марқұмның көршісі мен оның сүйіктісі болуы мүмкін деген ер адам тергеушілердің назарына іліккен. Кейін екеуі де сот бақылауымен босатылған. Алайда оларға Түркия аумағынан шығуға тыйым салынды.

Сонымен қатар тергеу барысында жаңа бейнежазба анықталған. Бейнебақылау камераларына Айсұлу Бекмаханованың қайғылы оқиға алдында үйіне қайтып келе жатқан сәті түсіп қалған.

Қазіргі уақытта Түркияның құқық қорғау органдары бейнежазбаларды зерделеп, оқиғаның мән-жайын анықтап жатыр. Қазақстандық бойжеткеннің ғимарат төбесінен қандай жағдайда құлағаны әзірге нақтыланған жоқ.

Еске салайық, 26 жастағы Айсұлу Бекмаханова 25 қазанда Ыстанбұлда ғимараттың төбесінен құлап, көз жұмған.Оның өліміне қатысты тергеу басталған болатын.

Бұған дейін Қазақстанның Сыртқы істер министрлігі аталған жағдайдан хабардар екенін және қазақстандық дипломаттар марқұмның туыстарына қажетті консулдық көмек көрсетіп жатқанын мәлімдеген.