Толқын Забирова келін түсіргелі жатыр: Болашақ келіні туралы не белгілі?

Қазақ эстрадасының жарық жұлдызы, әнші Толқын Забированың ұлы шетелде сүйіктісіне ұсыныс жасады, деп хабарлайды MadeniPortal.kz.

Әншінің ұлының таңдауы – Сара есімді ару. Жұлдызды отбасының болашақ келіні блогер ретінде танымал. 24 жастағы алматылық ару үйінің жалғыз қызы екені белгілі болды.

Кинг Сара кім?

Әлеуметтік желіде King Sarah есімімен танылған Сара Шакет – қазақстандық блогер әрі инфлюенсер. Ол сән, сұлулық, саяхат және күнделікті өмір тақырыптарында контент жариялайды. Сонымен қатар түрлі тақырыптық кештер мен іс-шаралар ұйымдастыруымен де танымал.

Сараның блог жүргізуге қызығушылығы мектеп кезінен басталған. Оның алғашқы видеоларының бірі екі апта ішінде 100 мың қаралым жинаған. Бұл жетістік жас блогердің әлеуметтік желідегі жұмысын жалғастыруына ықпал еткен.

Сара мектепті «Алтын белгімен» бітіріп, университетке грантпен түскен. Алайда кейін блог жүргізуге көбірек көңіл бөлуді ұйғарған. Ол әлеуметтік желідегі белсенділігінің арқасында өз аудиториясын қалыптастырып, жарнамалық жобалармен жұмыс істей бастаған.

Сара мен Шахрияр Бабаевтың қарым-қатынасы көпшілікке бұрыннан белгілі. Бұған дейін жұп бірге сұхбат беріп, болашаққа қатысты жоспарларымен бөліскен. Сара да сүйіктісінің анасымен таныс екенін айтқан.

Толқын Забирова туралы не белгілі?

Толқын Забирова – Қазақстанның еңбек сіңірген қайраткері, опера және эстрада әншісі, ұстаз. Ол 1970 жылғы 17 қазанда Семей облысының Аягөз қаласында дүниеге келген.

Әнші Ахмет Жұбанов атындағы Республикалық музыка мектебінде білім алып, кейін Құрманғазы атындағы Қазақ ұлттық консерваториясын тәмамдаған. Ол Қазақстанның музыкалық өнеріне өзіндік үлес қосып, орындаушылық қызметімен қатар ұстаздық жолды да қатар алып келеді. 2008 жылы «Қазақстанның еңбек сіңірген қайраткері» атағына ие болған.

Толқын Забирова отбасында үш ұл тәрбиелеп отыр. Тұңғышы – Шахрияр Бабаев. Әншінің айтуынша, үлкен ұлы Сингапурдағы университетті тәмамдап, қазіргі уақытта жеке кәсібімен айналысады. Ал екінші ұлы Диар анасының өнер жолын жалғастырып келеді.

Толқын Забирова бұған дейін болашақ келініне қатысты пікірін де білдірген. Әнші үшін ең маңыздысы – балаларының өз таңдауын жасап, бақытты өмір сүруі. Ол ұлдарының жеке шешімдеріне құрметпен қарайтынын айтқан.

Осылайша, әлеуметтік желіде танымал болған Кинг Сара мен әншінің үлкен ұлы Шахрияр Бабаевтың қарым-қатынасы тағы да көпшіліктің назарын аударды.