«Екі айлық сәби де қаза тапты: Ауруханада жойқын жарылыс болды

Колумбияның Толима департаментіне қарасты Планадес қаласында жойқын жарылыс болып, төрт адам қаза тапты. Марқұмдардың арасында небәрі екі айлық сәби бар. Тағы 18 адам жарақат алған, деп хабарлайды MadeniPortal.kz жергілікті билік пен шетелдік БАҚ мәліметтеріне сілтеме жасап.

Қайғылы оқиға 1 қараша күні кешке әскери базаға жақын орналасқан тұрғын ауданында болған. Алдын ала мәлімет бойынша, белгісіз адамдар жарылғыш зат тиелген жүк көлігін іске қосқан. Сондай-ақ шабуыл кезінде жарылғыш құрылғылар тасымалдаған дрондар қолданылған болуы мүмкін.

Жарылыстың қуаты соншалық, жақын маңдағы 177 тұрғын үйге зақым келген. Жергілікті аурухана ғимаратының шамамен 80 пайызы бүлініп, медициналық мекеменің жұмысы қиындаған. Билік тұрғындарды қауіпсіз жерге көшіруге мәжбүр болды.

Толима департаментінің губернаторы Адриана Матис қаза тапқандардың арасында екі айлық нәресте бар екенін растап, болған оқиғаны террорлық әрекет деп бағалады.

Шабуылдан кейін өңірде медициналық мекемелер жоғары дайындық режиміне көшірілді. Жарақат алғандарға шұғыл көмек көрсетіліп жатыр.

Колумбия билігі жарылысты ұйымдастырғандарды анықтау үшін тергеу бастады. Ел президенті Абелардо де ла Эсприэлья заңсыз қарулы топтарға қарсы әскери операцияларды күшейтіп, қауіпсіздік шараларын қатаңдатуды тапсырды.