Нәрестесін дәретханаға тастаған әйел үш жылға бас бостандығынан шектелді

Өзбекстанда жаңа туған нәрестесін ауладағы дәретханаға тастап, өліміне себепкер болған 33 жастағы әйел сотталды. Оған үш жылға бас бостандығын шектеу жазасы тағайындалды, деп хабарлайды MadeniPortal.kz.

Іс материалдарына сәйкес, оқиға 2026 жылдың 10 маусымында болған. Әйел түнгі сағат үш шамасында толғағы басталып, ата-анасынан перзентханаға жеткізуді сұраған. Алайда олар таң атқанша күтуді ұсынған.

Сағат 05:00 шамасында әйел ауладағы дәретханаға барып, сол жерде қыз баланы дүниеге әкелген. Сотта ол нәрестенің тыныс алғанын байқамағандықтан, өлі туды деп ойлап, дәретхана шұңқырына тастағанын айтқан.

Көп ұзамай әйелден қан кетіп, есінен танып қалған. Ата-анасы оны тауып, ауруханаға жеткізген.

Алайда сот-медициналық сараптама нәрестенің тірі туғанын анықтады. Сарапшылардың қорытындысына сәйкес, сәби дәретхана шұңқырына түскеннен кейін тыныс жолдарының бітелуі салдарынан тұншығып көз жұмған.

Сот барысында әйел сол сәтте өз әрекетін толық түсінбегенін және болған жағдайдың кейбір тұстарын есіне түсіре алмайтынын мәлімдеді.

Сот оны Өзбекстан Қылмыстық кодексінің 99-бабы — ананың жаңа туған баласын қасақана өлтіруі бойынша кінәлі деп таныды.

Үкімге сәйкес, әйел үш жыл бойы бас бостандығы шектеліп, үйінен тек жұмысқа немесе оқуға бару үшін ғана шыға алады.