Жеті жасар бала тауда жалғыз қалды: Әкесі сол жерде күтуге мәжбүрлеген

Жапонияда ер адам жеті жастағы ұлын Фудзи тауындағы туристік соқпақта жалғыз қалдырып, басқа баласымен бірге тауға көтерілуді жалғастырған. Бала бірнеше сағат бойы тауда жалғыз болған. Оны тау баспанасының қызметкерлері байқап, полицияға мәлімдеген, деп хабарлайды MadeniPortal.kz japantimes басылымына сілтеме жасап. 

Жапония полициясының мәліметінше, бала әкесі және ағасымен бірге Фудзи тауының 2000 метрден астам биіктікте орналасқан алтыншы станциясына дейін көтерілген. Сол жерде бала шаршағанын айтып, әрі қарай жүре алмайтынын жеткізген.

Осыдан кейін әкесі ұлына сол жерде күтіп отыруды тапсырған да, өзі басқа баласымен бірге жоғары көтерілуді жалғастырған. Бала шамамен сегіз сағат бойы жалғыз қалуы керек болған.

Жеті жастағы баланың жанында тек жеңіл тағамдар мен алкогольсіз сусын болған. Оның ақшасы да болмаған.

Баланы ересектердің қарауынсыз жүргенін тау баспанасының қызметкерлері байқап, полицияға хабарлаған. Құқық қорғау органдары баланың әкесімен байланысқа шыққан. Ол кезде ер адам Фудзи тауының сегізінші станциясында болған.

Әкесі төменге оралғаннан кейін полиция баланы оған тапсырған. Құқық қорғау қызметкерлері ер адамға баласын тауда жалғыз қалдырғаны үшін қатаң ескерту жасаған.

Ер адам өз әрекетінің абайсыздық болғанын мойындап, жасаған ісі үшін кешірім сұраған.