"Аяғыма оқ тиіп, кестіруге мәжбүр болдым": Паралимпиада чепионы атанған Ербол Хамитов оқиғасын бөлісті

Паралимпиада ойындарының алтыны мен қоласын жеңіп алып, ел қоржынына тарихи жүлде салған Ербол Хамитов чемпиондық жолы туралы айтып берді, деп хабарлайды MadeniPortal.kz Stan.kz-ке сілтеме жасап. 

Ербол Хамитов 1997 жылы Петропавл қаласында дүниеге келген. Бала кезінен ата-әжесінің тәрбиесінде өскен. Спортшы балалық шағында аздап бұзық болғанын жасырмады.

"Бала кезімнен ата-әжемнің қолында өсіп, сол кісілердің тәрбиесін алдым. Балалық шағымда бұзықтау болдым. Мені көріп отырған жас спортшыларға айтарым: өздеріңізге сеніңдер, ешқашан берілмеңдер. Әрқашан тек алға ұмтылыңдар", – дейді Ербол Хамитов.

2017 жылы Петропавл қаласында болған атыс кезінде Хамитовтың аяғына аңшы мылтығының оғы тиіп, аяғын кесуге мәжбүр болған.

"Жастықпен қатар жігерім артып, бір сәтте абайсыз әрекетімнен аяғымнан айырылып қалдым. Нақтырақ айтсам, оқ тиіп, бір аяғым тізеден төмен кесілді. Бұл жарақат мені қатты күйзеліске салды. Дегенмен өмірден бас тартпадым. Өзіме қиындыққа мойымайтын адам болуға уәде бердім. Өткенге өкінбей, өз жолыммен алға жылжуды жөн көрдім. Ең бастысы – ата-анамның разылығы мен үшін бәрінен маңызды", – дейді спортшы. 

Ол сынаққа сынбай,  бір аптадан соң спортпен шұғылдана бастаған

"Отадан кейін бір жарым апта өткен соң үйге шығарды. Содан кейін ақырындап жаттығуларға кірістім. Бастапқыда балдақпен жүріп жаттыға бастадым. Қалай болғанда да бұл сынақ маған біраз жігер берді. Мүгедек адамдар да биік шыңдарды бағындырып жатқанын көрдім. Сондықтан пара шаңғы және пара биатлонмен айналысуға шешім қабылдадым. Сол төккен тердің жемісін көріп отырмын. Менің ойымша, адамның басына қандай сынақ келмесін, мойымау керек. Спортта физикалық күштен бөлек, ішкі ерік-жігерің мықты болса, алынбайтын қамал болмайды", –  дейді Ербол.

Осыдан кейін Ербол 2018 жылдан бастап пара шаңғы және пара биатлонмен кәсіби түрде айналыса бастаған. Спортты тек физикалық күш емес, ішкі ерік-жігердің де маңызды екеніне тоқталды.

Пара спортқа келу жолында Ерболға қолдау көрсеткен адамдар көп болғанын да атап өтті. 

"Менің осы спортқа келуіме Висилова Сергеевна мен Анатолий Игрович үлкен бағыт-бағдар берді. Бастапқыда мен параспортшыларды мойындамадым. Бірақ уақыт өте келе олардың қаншалықты мықты, қайсар әрі еңбекқор екенін түсіндім. Қазір мен үшін үлгі тұтатын паралимпиадашылар бар. Мен параспортқа 2018 жылы келдім, сол уақыттан бері осы салада өзімді дамытып келемін", –  дейді Хамитов. 

Ербол Хамитов 2023 жылы әлем чемпионатында ел тарихында бұрын-соңды болмаған нәтижеге қол жеткізіп, айды аспаннан бір-ақ шығарды. 

2023 жылы Ербол Хамитов Швецияда ерекше жетістікке жетіп, пара биатлон мен пара шаңғыдан Қазақстан тарихындағы тұңғыш әлем чемпионы атанды.

Сол кезде әкімдік спортшыға арендаға үш бөлмелі пәтер берді. Ал 2025 жылы әкімдікке кіргенде сол пәтерді өзі сатып алуды сұраған.

2025 жылы биатлоннан 12,5 км жеке жарыста әлем чемпионы болып, паралимпиадашылар арасындағы биатлон бойынша Әлем кубогының жалпы есебінде жеңіске жетті.

Ол басты мақсаты сыйлық емес, Қазақстан мен әлем тарихында өз есімін алтын әріппен қалдыру екенін атап өтті.

"Есімді әлем және Қазақстан тарихында қалдырғым келді. Бүгін арманыма жеттім. Өзім осыдан біраз уақыт бұрын күнделігіме “Паралимпиада чемпионы болсам екен” деп жазып едім. Армандар орындалады екен", – дейді Ербол Хамитов.

Ол бұған дейін Паралимпиада ойындарында Ербол Хамитов отырып жарысатын спортшылар арасындағы шаңғы спринтінде қола медаль жеңіп алды. Ол іріктеуде алтыншы орын алып, жартылай финалда өз тобында бірінші болды.