Қызылордада дәрігерлер әйелге кесарь тілігін жасаған кезде қуығын тесіп алған

"Менің ет жақыным бес ай бұрын осы "Ана мен бала" орталығында босанды. Оған алдымен жасанды толғақ беріліп, кейін кесарь тілігі жасалған. Операциядан кейін әйелдің жағдайы нашарлап, дене қызуы көтерілді. Бұған қоса, денесінің бір жағы сіресіп, қалтырап ауырған. Ертеңіне дәрігерлер бізге "жатырын алып тастау керек" деді. Ақыры дәрігерлердің ұсынысымен жатырын алып тастауға келістік", – деді Ботагөз Жүсіптегі.

"Кесар тілігі, жатырды алып тастауды қосқанды, жалпы екі үлкен ота болды. Арасы екі күн. Ақыр соңында қуығын тесіп алады. Оны айтпайды. Үйіне келсе, дәрет шықпайды. Одан бері бес ай өтті! Бес айдан бері әйел ересектерге арналған жөргек киіп, мүгедек боп қалды. Бірақ сондағысы мұнда біз ғана шырылдап жүрміз", – деп жазды ол.

"Қуығы тесілгеннен кейін қаншама дәрігерге барды. Баласына басқа адамдар қарауға көмектеседі, әйел былайша айтқанда мүгедек болып қалды. Сөйтіп біздің облыстағы дәрігерлер бұл тесіктің үлкен екенін айтады. Біз жасай алмаймыз" деп басқа жаққа жібереді. Енді тесілген қуықты жергілікті дәрігер тіге алмайды, себебі қауіпті әрі үлкен көлемде екен", – деді блогер.

"Енді дәрігерлерден жауап талап етеміз. Заңгерлермен, адвокаттармен кеңесіп жатырмыз. Олар: "Сіздерге көмек ретінде 1,5 миллион теңге берейік, порталдарыңызды шешіп берейік, ал әрі қарай өздеріңіз білесіздер" дейді. Біз бұл ұсыныспен келіспейтінімізді, өзіміздің талаптарымыз бар екенін айттық. Сонда үш баланың анасы, 30-ға толмаған жас әйелдің өмірі 1,5 миллион теңге ме? Алматыға барып-келу, бес ай бойы кеткен шығынды айтпағанда, адам өмірінің бағасы осы ма?" – деді Ботагөз Жүсіптегі.

“Бауырымды қазір өте қатты уайымдап тұрмын. Қазір портал арқылы Алматыға дайындалуымыз керек. Ол үйде ата-енесімен тұрады, жалғыз күйеуі ғана жұмыс істейді. Бес ай бойы әйелін бақты, күніне қаншама дәрі-дәрмек кетті. Біз енді оның бәрін есептегенде шегіне жете алмаймыз. Алматыға қанша рет ұшып бару керек, оның қасында бөпеміз болу керек, өйткені емізулі. Әйелдің өзіне бір адам керек, баласына әйел ауруханада жатқанша қарайтын тағы бір адам керек. Осының бәрінің шығынын есептеп отырмыз", – деді Ботагөз Жүсіптегі.

"Ертең денсаулық сақтау басқармасының жаңа басшысы бізді қабылдап, жауапты мамандар жазасын алуы үшін арыз жаздық. Себебі ол дәрігерлер әлі де өз қызметін жалғастырып жүр. Қаншама бала анасыз қалса, не болады? Жаңа басшы құлақ түрер ме екен?! Есін жисын, қалпына келер, дәрігерлер де адам, қате кеткен болар, бастысы аман болса болды деп едік… Өкінішке қарай, қалпына келетін түрі жоқ", – деп жазды блогер.

"Аталған өтініш белгіленген тәртіппен қаралып, пациентке көрсетілген медициналық көмектің сапасына қатысты мән-жайлар зерделенуде", – делінген Қызылорда облысының денсаулық сақтау басқармасы жауабында.