Атырауда үш жастағы қыз анасының өліміне куә болған

Атырауда 42 жастағы әйелді аса қатыгездікпен өлтіру фактісі бойынша тергеу жүргізілуде. Қылмысқа күдікті ретінде оның азаматтық некедегі жұбайы ұсталды. Туыстарының айтуынша, үш жасар қызы қайғылы оқиғаның куәсі болып, полиция қызметкерлеріне не болғанын айтып берген, деп хабарлады MadeniPortal.kz.

Атырауда 42 жастағы әйел өз пәтерінде өлі күйінде табылды. Полиция мәліметінше, қылмыс жасады деген күдікпен оның 38 жастағы азаматтық некедегі жұбайы ұсталған.

КТК телеарнасының хабарлауынша, қайғылы оқиға көпқабатты тұрғын үйлердің бірінде болған. Көршілер ешқандай айқай-шуды естімегендерін айтқан. Әйелдің мәйітін кешкі уақытта үйіне келген 16 жастағы қызы тауып алған. Сол кезде жанында үш жасар сіңлісі болған.

Марқұмның туыстарының айтуынша, кішкентай қыз кісі өлтіру оқиғасының куәгері болған. Оның айтуынша, әкесі анасын пышақпен жарақаттаған. Қыз қатты жылай бастағанда, ер адам оқиға орнынан қашып кеткен.

Марқұмның жақындары әйелдің бұған дейін азаматтық некедегі жұбайының агрессивті әрекеттеріне шағымданып, полицияға бірнеше рет жүгінгенін де мәлімдеді.

Күдікті ұсталып, уақытша ұстау изоляторына қамалды. Аталған дерек бойынша кісі өлтіру бабы бойынша қылмыстық іс қозғалды.

Қаза тапқан әйелдің туыстары оның екі қызының қамқорлығын өз мойындарына алып, балаларға болған жағдайдан кейін психологиялық және тұрмыстық қолдау көрсетуге ниетті екендерін айтты.