«Ес-түссіз жатты, бүкіл денесі қан болды»: Ұлдананың күйеуі сотта тың дерек айтты

Астанада қызметтік міндетін атқару кезінде ауыр жарақат алып, кейін көз жұмған фельдшер Ұлдана Мырзуанның күйеуі Әділет Зейнел сотта қайғылы күннің қалай өткенін егжей-тегжейлі айтып берді, деп хабарлады MadeniPortal.kz.

Оның сөзінше, 8 қараша күні ерлі-зайыпты Қосшы қаласындағы үйінен бірге шығып, жұмысқа аттанған. Ұлдананың күндізгі ауысымы болса, Әділет №1 қалалық ауруханада кезекшілік атқарған.

«Шамамен 06:30-да үйден шықтық. 07:45-те жұмыс орындарымызда болдық. Кейін хат жазысып отырдық. Сағат 10:00 шамасында ол маған бір жерге шақыртуға бара жатқанын, құлау дерегі болғанын және науқасты біздің ауруханаға жеткізуі мүмкін екенін жазды. Осыдан кейін байланыс үзілді», – деді ол.

Күйеуінің айтуынша, сағат 10:50 шамасында аурухананың ішкі телефоны арқылы оған әйелі қабылдау бөлімінде жатқанын және оны танып-білу үшін төменге түсу керектігін хабарлаған. Алғашында ол мұны әзіл деп қабылдаған. Алайда бірнеше минуттан соң анасы қоңырау шалып, Ұлдананың шокқа қарсы палатада жатқанын айтқан.

Әділет төменге түскенде әйелінің ауруханаға аты-жөні белгісіз адам ретінде жеткізілгенін білген.

«Оның ес-түссіз жатқанын көрдім. Бүкіл денесі қан болды. Басының жанында кірпіш пен темірдің ұсақ сынықтары жатты. Дәрігерлер киімін кесіп жатты», – деп еске алды ол.

Оның айтуынша, Ұлдана сол күйі есін жимаған. Тек саусағын қимылдатқанымен, сөйлей алмаған және көзін ашпаған.

Фельдшер 8-18 қараша аралығында ауруханада өмір үшін күрескен. Осы он күн бойы оның күйеуі, анасы, әпке-сіңлілері мен басқа да жақындары ауруханадан шықпаған.

«18 қарашада маған барлық ағзасының жұмысы тоқтап бара жатқанын айтты. Бізді бұған алдын ала дайындады. Сағат 10:00 шамасында жүрегі тоқтағанын хабарлады», – деді Әділет Зейнел.

Осылайша, сотта марқұм фельдшердің соңғы жұмыс күні мен ауруханадағы он күндік өмір үшін күресінің ауыр сәттері алғаш рет күйеуінің аузынан егжей-тегжейлі айтылды.