«Көзін бөлшектеп жинады»: Таразда соққыға жығылған оқушы жетінші операцияға дайындалып жатыр

Таразда мектептегі төбелестен кейін бір көзінен айырылған 16 жастағы оқушының анасы әділдік іздеп жүр. Жасөспірім жарты жылға жуық уақыт ішінде алты операция жасатқан. Алайда анасының айтуынша, ұлын соққыға жыққан бірнеше баланың тек біреуі ғана сот алдында жауап беріп жатыр, деп хабарлайды MadeniPortal.kz КТК телеарнасына сілтеме жасап.

Оқиға сәуір айының ортасында Тараздағы гимназиялардың бірінде болған. Үзіліс кезінде 10-сынып оқушысы Дамир Сураншиев пен бірнеше тоғызыншы сынып оқушысының арасында жанжал туындаған. Кейін жасөспірімді ер балалардың киім ауыстыратын бөлмесіне шақырып, соққыға жыққан.

Дамирдің айтуынша, жанжал дәлізде басталған.

Алты операция жасалды, жетіншісіне дайындалып жатыр

Жасөспірім сәуір айынан бері негізінен бір қалыпта жатуға мәжбүр. Дәрігерлер көздің тор қабығын сақтап қалу үшін оның қозғалысын шектеген. Анасының айтуынша, ауыр соққыдан баласының көз алмасы жарылып, дәрігерлер бірнеше күрделі операция жасаған.

Қазір Дамир жетінші операцияға дайындалып жатыр. Дәрігерлер оның екінші көзіне де әсер етуі мүмкін асқынуларды анықтаған.

«Неге тек біреуі ғана жауап беріп жатыр?»

Дамирдің анасы Зухра Каримова ұлына бірнеше оқушы шабуыл жасағанымен, сот алдында тек бір жасөспірім жауап беріп жатқанына наразы.

Оның айтуынша, бастапқыда оқиғаға қатысы бар деп қарастырылған тағы бір жасөспірім кейін куәгер мәртебесін алған.

Жамбыл облыстық сотының баспасөз қызметі іс бойынша сот талқылауы жүріп жатқанын растады.

Әзірге іс бойынша түпкілікті сот шешімі шыққан жоқ. Ал Дамирдің анасы оқиғаға қатысы бар барлық адамның әрекетіне заң аясында баға берілуін талап етіп отыр.