Оңтүстік Кореяда қазақстандық қамауға алынды

Оңтүстік Кореяда жергілікті көлік жүргізушісіне қоқан-лоқы көрсетіп, оның автокөлігін бүлдірген, деп хабарлады MadeniPortal.kz кореялық БАҚ-қа сілтеме жасап.

Оқиға 29 шілдеде Оңтүстік Кореяның Ичхон қаласында болған. Тергеу мәліметінше, екі қазақстандық автокөлікпен жергілікті тұрғынның соңынан қуып, кейін жолын бөгеген. Олар көліктен түсіп, жүргізушіні қорқытқан. Ер адамдардың бірі жәбірленушінің автокөлігін тепкілеген. Оқиға бейнетіркегішке түсіп қалған.

Ұсталған азамат жауап алу кезінде сол күні көлік сатып алу жөніндегі келісімі жүзеге аспай қалғанын айтқан. Оның сөзінше, ол жәбірленушінің автокөлігін келісім жасасуы тиіс адамның көлігімен шатастырып алған. Бастапқыда полиция күдіктілерді анықтай алмаған. Алайда оқиғаның видеосы әлеуметтік желілерде тарағаннан кейін тергеу қайта жанданып, тәртіп сақшылары көліктің мемлекеттік нөмірінің бір бөлігін қалпына келтірген. Осылайша күдіктілердің бірінің жеке басы анықталған.

16 қазанда 21 жастағы қазақстандық ұсталып, сот оның қашып кету қаупіне байланысты қамауға алынуына санкция берген.

Ал оқиғаға қатысы бар екінші азаматтың 25 жастағы қазақстандық екені анықталған. Ол бұған дейін көші-қон заңнамасын бұзғаны үшін Оңтүстік Кореядан шығарылған. Қазақстанның Сыртқы істер министрлігі отандасымыздың ұсталғанын растады. Ведомство мәліметінше, оған бөтеннің мүлкін бүлдіру, сондай-ақ көші-қон және жол қозғалысына қатысты заңнаманы бұзу бойынша да айыптар тағылып отыр.

Қазіргі уақытта қазақстандық дипломаттар ұсталған азаматқа консулдық-құқықтық көмек көрсетуде. Оқиғаға қатысты тергеу жалғасып жатыр.