«Қазақстанға қауіпті вирус келуі мүмкін»: Денсаулық сақтау министрлігі ескерту жасады

Қазақстанға шетелден маймыл шешегі вирусының әкеліну қаупі бар. Алайда инфекцияның ел аумағында жаппай таралу ықтималдығы төмен. Бұл туралы ҚР Денсаулық сақтау министрлігі мәлімдеді, деп хабарлайды MadeniPortal.kz ведомство ақпаратына сілтеме жасап.

Министрліктің мәліметінше, әлемнің бірқатар елінде маймыл шешегін жұқтыру жағдайлары әлі де тіркеліп жатыр. Халықаралық сапарлар мен жолаушылар қозғалысы инфекцияның Қазақстанға сырттан әкеліну қаупін арттырады.

Осыған байланысты елімізде шекарадағы санитариялық-карантиндік бақылау күшейтілген. Мамандар эпидемиологиялық жағдайды тұрақты бақылап, ауру тіркелген мемлекеттерден келетін жолаушыларды тексеріп жатыр.

Сонымен қатар медициналық мекемелер мен зертханалар инфекцияны дер кезінде анықтауға дайын. Ведомство мәліметінше, әзірге шекарадағы өткізу пункттерінде маймыл шешегін жұқтырған немесе аса қауіпті инфекцияға күдікті адамдар анықталмаған.

Маймыл шешегі негізінен инфекция жұқтырған адаммен жақын қарым-қатынас кезінде, сондай-ақ вируспен ластанған заттар арқылы беріледі.

Аурудың негізгі белгілеріне дене қызуының көтерілуі, бас пен бұлшықеттің ауыруы, лимфа түйіндерінің ұлғаюы және теріде бөртпенің пайда болуы жатады.

Денсаулық сақтау министрлігі тұрғындарға күмәнді бөртпелері бар адамдармен жақын байланыстан аулақ болуды, жеке гигиена талаптарын сақтауды және ауру белгілері байқалған жағдайда дереу дәрігерге қаралуды ұсынады.

Еске салайық, бұған дейін Ресейде маймыл шешегіне күдікпен шамамен 10 адамның ауруханаға жатқызылғаны хабарланған болатын.