Тоқаев бір жылда Экватор бойынша жер шарын 4 рет айналып шыққан

Бір жыл ішінде Президенттік ұшақ әуе кеңістігінде 158 983 шақырым ұшып өткен. Президенттің ұшақтар мен тікұшақтарда өткізген уақыты 245 сағат 18 минутты құраған. Бұл уақыт Жер шарын экватор бойымен төрт рет айналып шығумен пара-пар.

Қасым-Жомарт Тоқаев биыл 22 шетелдік елшіден сенім грамоталарын қабылдап, 50-ден астам телефон арқылы сөйлесу өткізді.

Madeniportal.kz Тоқаевтың жұмысына қатысты деректерді қолдана отырып, статистика тізбегін жазады:

Сапарлар мен кездесулер:

Биыл Президент 11 өңірге табан тіреп, 60 нысанды аралаған. 137 рет қоғамдық және саяси тұлғалармен кездесулер өткізді, сондай-ақ 41 шараға қатысқан.

Халықаралық қызмет:

- 23 мәрте мемлекеттік сапармен шетелге барды.

- 19 форум мен саммитке қатысты.

- 27 әлемдік көшбасшылармен кездесті.

Жыл басынан бері Президент мемлекеттік сапармен Қатар, Әзербайжан, Сингапур, Тәжікстан, Моңғолия, Франция мен Венгрияға барды, сондай-ақ ресми сапармен Италия, Ватикан, Армения, Түрікменстан және Сербияға секілді елдерге барған. Мұндағы басты мақсат Қазақстанның халықаралық аренадағы орнын нығайту жұмыстары еді.

Биыл әлеуметтік және экономикалық өзгерістер де болды. Бұл қатарда мына мына үштікті айрықша атап өтуге болады:

- «Әйелдердің құқықтары мен балалардың қауіпсіздігін қамтамасыз ету туралы» заң және тұрмыстық зорлық-зомбылыққа жаза күшейтілді.

- «Комфортты мектеп» жобасы аясында 217 мектеп салынды.

- Ауыл шаруашылығы қызметкерлерінің қолдауымен 26,7 млн тонна астық жинау рекорды жасалды.

Инфрақұрылым бойынша ауыз толтырып айтарлықтай нәтижелер де болды. Мәселен, Президент Қытайда көлік-логистикалық орталық ашуға қатысты. АЛ ел бойынша 12 мың шақырым автожол жөнделді және салынды. Ұзақ жылдар халыққа қиындық тудырып келген Бұқтырма су қоймасындағы қатынас оңтайландырылып, жаңа көпір пайдалануға берілді.

Бір сөзбен айтқанда, 2024 жыл Қазақстанның дамуына бағытталған өзгерістерге толы кезең болды.

Бұдан бөлек, Қазақстан Республикасы Президентінің кеңесшісі – Президенттің Баспасөз хатшысы Берік Уәлидің жазуынша жыл басынан бері www.akorda.kz ресми сайтында Мемлекет басшысының қызметі, Қазақстан халқына Жолдауы, Президенттің түрлі шараларда сөйлеген сөздері мен үндеулері туралы 814 ақпараттық хабарлама орналастырылған. Президенттің баспасөз қызметінің негізгі платформаларының бірі – Aqorda телеграм-арнасында 7 804 хабарлама, Facebook парақшасында – 1 801 жазба, Instagram парақшасында – 1 727 пост жарияланды.

Мемлекет басшысы шетелдік сапарлары мен қабылдаған шешімдері туралы әлеуметтік желілерде де хабарламалар жариялайды. Бұл халықпен тиімді кері байланыс орнатудың маңызды құралы болып табылады. Жыл басынан бері Президент өз Twitter парақшасында 20 твит, Instagram-да 30 пост жариялаған.

Сонымен қатар, Президентке келіп түскен өтініштер, шағымдар мен талаптарды жинау және талдау жұмыстары Президент Әкімшілігінің өтініштерді қарау бөлімінде жүргізіледі. Биыл бұл платформа арқылы түскен азаматтардың өтініштерінің саны 49 069-ге жетті (2024 жылғы 26 желтоқсанға дейін).