Елде түрмедегі әйелдерге рақымшылық жасалмақ

Министрлік түрмедегі әйелдерге рақымшылық жасау жөніндегі ұсынысты қолдады, деп хабарлайды Madeniportal.kz.

Ішкі істер министрлігі депутат Қарақат Әбденнің әйелдерге рақымшылық жасау жөніндегі ұсынысын қолдап отыр. Алайда ІІМ оның бірқатар теріс тұстары бар екенін айтты. Яғни қылмыстан зардап шеккен азаматтар арасында наразылық туындап, ал рақымшылық жасағандар қайтадан заң бұзуы мүмкін.

Ресми мәліметке сүйенсек, қазір 6399 әйел жазасын өтеп жатыр. Оның 2692-сі бас бостандығынан айыру орындарында болса, 3707-сі пробациялық бақылауға алынған.

Министр Ержан Сәденов Конституция бойынша заң мен сот алдында бәрі бірдей екенін де еске салды.

“Ешкімді жынысына байланысты кемсітуге болмайды. Әлеуметтік осал адамдар санатына жататын сотталған ерлер саны – 920 адам. Сонымен қатар, бірінші рет сотталғандарды және зорлық-зомбылықсыз қылмыстар жасағандарды босату мәселесі жәбірленушілердің құқықтарын қорғауды ескере отырып, одан әрі талдауды қажет етеді”, - деді ІІМ басшысы.

Оның сөзінше, 1,2 мыңнан астам әйел рақымшылыққа ілінуі мүмкін. Жалпы екі мыңнан астам сотталғанды босату бір жылда 2,1 млрд теңге бюджет қаражатын үнемдеуге мүмкіндік бермек.